第五章 好秀才 (3)
亞孝曰 ：“你離得遠，而且咁斯文，唔通將紳衿來打麼？”亞 悌勸了幾番，亞孝都唔肯聽。遲得幾日，亞忠、亞信來投告。
又遲幾日，亞仁、亞義亦來投告。更計日間，亞成自己來探，曰：“細佬，我想唔做大哥咯，唔做亦極之難，個班細佬更加放肆，我有時火起。總之，用拳頭做家法。至於亞孝更可惡，我有肯容過但 。”亞悌曰：“大哥不宜怒氣，個的細佬，點能 學得你咁明白呢？”（明白得淒涼）細佬唔明，慢慢教道。大哥拳頭重，自己唔知，恐一時打傷，骨肉之情，心有不忍，就是父母在九泉之下，亦有難安 。”（能體貼親心，必能愛到兄弟）話完，不覺眼淚滴下，亞成歎曰 ：“細佬個個唔學得你呀！ ”兩兄弟講話一番，陪待飲食而去。不數日，又有兄弟來投告。
一月數次諫說，亦不依從。亞悌見無奈之何，不如三十六著，又以走為上著，即將家眷搬遷去三泊，離家百有餘裏，路途遠隔，是非不聞，自尋安靜而已。
善言俱作耳邊風，我亦從今詐耳聾。
拍手又攜家眷去，買園三畝種通蔥。
眾兄弟等見亞悌秀才遠避，雖有委曲之處，難以分憂。論起亞成做事頗公道，總係帶躁暴，唔函養得到，所以個班細佬多怨怒。今亞悌既往了三泊，家中所有大小事務俱以亞成大哥為主，不得不要怕他、依他而順承他，習久相安，亦少爭競矣。
又說亞孝之年，有四十六歲，結發妻生二子，妾氏生二子，隨又收起一個婢做妾，生一子，共生五子。長子繼業，派第一，繼德派第三，此兩個係結發所生，繼功派第二，繼績派第四，此兩個係妾所生，繼祖派第五，此一個係婢所生。五子皆有家室，添得幾孫，村中有人稱亞孝做多仔公，又為好命公矣。
亞孝一生做出咁多德業麼？咁多功績麼？若係生一個仔，難以承繼得完，妙在仔多，分開一人繼的。
誰不知個班仔，性情暴庚，了不可當，個個俱能繼父之誌。隻有第五仔改名繼祖，不肯繼父，而繼亞公，其餘皆學足亞孝規矩。所以古人有詩雲：
兄弟同居忍便安，莫因毫末起爭端。
眼前生子又兄弟，留與兒孫作樣看。
所謂有樣瞧樣，學翻個形像也。
一日，繼業話繼德曰 ：“細佬，我兩兄弟係大婆仔，佢三 兄弟係細婆仔。本心之講，我著硬邊呀，（恐怕骨多鯁喉）就係欺佢打佢，佢有恨出尺呢？”繼德曰 ：“著咯，著咯！唔駛界情麵佢，佢叫我做亞哥，都唔好應佢 。”（你咁樣無情，恐 怕當之不起）繼績聞之，亦話繼功曰 ：“亞哥，今者繼業兩兄 弟會埋，想來欺負我，唔駛怕佢，佢有細佬，我亦有亞哥，佢有兩對手，我亦有四隻，佢拈銅鞭，我執鐵尺，你慌駛輸過佢麼？悌來頭湊，唔似陣勢，一齊動手 。”（好似戲棚，個的花 花公子一樣）繼功曰 ：“自不然呀，我大早有此意，未有話你 知。今講起來，不可不慮。
（你實在未有憂慮，就係殺死兄弟，可能了得事麼）我前日買定一張單刀，放在床頭，遇時預備要用。佢若真來尋打，就先下手為強，免至受虧一著 。”於是大 婆仔結為一黨， 細婆仔又結為一黨矣。（家運衰到個樣子）獨 至繼祖，係婢所生，並無同胞兄弟，母又早死，自己年輕，四個亞哥每欺淩佢。亞孝見幾個仔，遇時嘈鬧，彼此不和，因罵之曰 ：“你兄弟點解得咁暴戾呀？兄不愛弟，弟不讓兄，你聚 為一圖，我結為一黨，相憎相厭，似殺父之仇，成何規矩！你兄弟不盡同母而生，亦皆同父而出，曉得連枝同氣，當念手足之情，為何情義俱無，隻想尋仇作對？你等將來亦有子孫生養，照樣學你，豈得叫做為人？”（極好道理，實將自己大罵一場）
個班仔答曰 ：“我非拜他人做師傅， 原來學你之所為。（父道兩兼師道，喃魔先生教仔，盡符盡法）好之你會埋三叔四叔，專去欺五叔六叔，你想下，自己點樣好法呀？隻曉得罵人，唔罵自己 。”（徒弟惡過師傅咯）亞孝聽聞幾句說話，即垂頭無 語，長歎一聲而去。