第五章 好秀才 (1)
昆陽縣附城地方，有一人姓曾，名恭禹，家資數幹。結發之妻顏氏，生一子，名叫亞成。養至七八歲，值明朝天啟之時，地方盜起，不幸遭亂，妻子被賊捉去。亂定之後，續娶一個填房孔氏，又娶妾楊氏，妻生三子。妾又生三子。論起層次，長子亞孝派第一，亞忠派第三，亞信派第四，此三個仔，俱係正妻所生。亞悌派第二，亞仁派第五，亞義派第六，此三個仔，俱係妾氏所生。六個仔，名為孝悌忠信仁義，六個字俱是好字眼，似乎一家都是好人矣。（六個仔，其父時時叫。六個字之好，其父未必時時講也。可惜可惜！）六個仔之中，惟亞悌係秀才，果然好人品，依道理而行。其餘五子，俱是惹是招非，而性情暴戾者也。
世有改其子之名叫做亞善，未有叫做亞惡者。有叫做亞良，未有叫做亞匪者。猶之乎改個堂名，有的叫做積善堂，有的叫做種福堂，諸如此類，不可勝計也。既稱積善，自問一年積得幾多呢？既稱種福，自問一世種得幾多呢？若非積善而自認積善，並無種福而自認種福，則是欺人騙人，而並欲以自欺自騙也。
有時對人曰 ：“我一世啥好講大話。”如此重，唔係 講大話麼？或有寫積善堂，其實好積惡，寫積福堂，其實好種禍，即係掛家用招牌而專好賣假貨也。
其後，曾恭禹因病而死，眾子相聚守喪。將入棺時，死者眼中淚如湧出，眾人看見個個皆驚，以為奇怪。亞涕秀才曰：
“父入棺而出淚，必有不祥。父親知我兄弟平日好鬥，將來必有禍患，故雖死不安而流淚，告我眾兄弟務宜一團和氣，忍事為佳，免父在九泉猶難閉目 。”各兄弟笑曰：“你勿講得咁廢， 唔關個的事，總係喃魔先生擇時辰，唔得幹淨耳 。”殯葬既畢， 兄弟分產異居。亞孝自高自傲，以亞悌、亞仁、亞義係庶母所生，不以骨肉相待，作佢為低一格而卑賤之。結理亞忠、亞信，作為一黨，話 ：“我三兄弟係大婆仔，佢三個係妾氏仔，就欺 佢打佢，都唔奈得我乜何？”（果然好亞哥、好帶頭、好倡率，所謂一隻牛唔好，攪壞一欄）亞忠、亞信亦以為然，好似狐假虎威，狼跟豺尾。有時客來探，到開筵飲酒，亞仁、亞義經過堂下，不叫一言。仁、義忿告亞悌曰 ：“豈有此理！咁無情份， 唔通兄弟不如外人，朋友尚且交杯，而細佬行過，竟然不恤。
佢不以我為弟，我亦不以佢為兄，不如我三兄弟，亦聯理結為一黨，共佢相抗。況且我二哥係做秀才，斷唔輸得過佢 。”亞 悌勸曰 ：“細佬，唔係咁講，佢做亞哥唔明，我忍讓下佢，世 界事情有乜緊要呢？路上相逢，尚且讓人三步，何況自己兄弟，講乜冤仇呀！細佬之言，我不從你 。”（真正好秀才，曉得大 道理，心內有主張，不愧讀書人本領）亞仁、亞義年紀尚輕，因亞悌之言其意亦止。
又說亞孝，有個女嫁縣城外姓周。亞孝誣賴親家，話唔醫理佢女，以至於死。喝起兄弟子侄及潑婦等，去捉親家婆，要打過以消此恨。又話亞悌曰 ：“你做個秀才，份外有的膽色， 你都要去，唔好延遲 。”亞悌諫曰：“佢做家婆，豈有唔愛新 婦之理？請醫下效，難以挽回。今糾率多人捉他淩辱，你做得出，難對鄉鄰，叫我同行，我斷不去 。”（唔係怕事，總係怕 羞）亞孝曰 ：“細佬，你勿去咯，我估你做秀才，幫得下手， （幫你欺人麼）誰知唔做得料駛，在你三分責，一片講執滯， 我話你係廢 。”
亞悌個的廢法，正是超群脫俗，高出庸眾之流。
豈同砧板蟻、溝渠鴨、臘豬頭、烏龍尾，遇人有的小事，便想插身人內，挑三撥四，作浪生風，講周身本領，兜錢入荷包麼？
由是不聽亞悌之言，叫齊忠、信、仁、義與子侄等，及族中無賴之徒，去捉周氏親家婆，拳打腳踢。有的去打爛水缸，有的去打穿米塔，有的去打崩飯鑊，有的拈斧頭砍破大門，有的執竹篙攏掃屋瓦，打得穿崩破爛，好處無存。眾等歸來，盡情投告，亞孝拍掌跳起曰 ：“好呀！好呀！將佢家私什物散清， 都係爽呀！”