我怕你痛死都唔醫你 。”
姚氏聽到此話，知係真情，個陣口軟聲低，細聲問曰 ：“ 亞叔，真正嗎？”蘭吉曰 ：“話係咯唔通嚇你麼？”姚氏垂頭 氣短，曰 ：“你唔係嚇我，聽你講起來，我心都怕，大約都係 冤孽咯。若話唔信，何以外科先生請得多，總不見應效？其喃魔先生、盲公鬼婆都信過，總唔見功呢？二叔呀，包你見個管鐵釘，都唔共我拔出呀？”蘭吉曰 ：“我想拔出，但是守獄卒 唔肯呀 。”姚氏曰：“唔通由得我痛死？我病了三年，痛到魂 都有了咯！咁樣重有乜方法呢？”蘭吉曰 ：“除是轉心腸，自 後唔好咁惡毒，或者可以好得，都未可定 。”話完，拂袖出門 而去。
姚氏在床，左思右想，此事實自己之錯。論起世間至有情者婦人，聞人報到亞姨生仔，亞嶺生仔，亞姑生仔，就歡喜不了。又買豬肉，捉雞，送去做滿月，及賀開燈。何故自己之妾生兒，作為仇敵？況且個仔長大，將來發財奉養我，娶新婦服事我，就係做官先封贈我，百年之後，忌辰拜我。世人認個契仔尚且親之愛之，何況妾氏之兒，與我著三年服也。如果當時唔害死佢，如今有三四歲，可以扶住床邊，行來問病。就係病死，亦有個仔，捧我神主牌，拈枝幡竿柄，風飄飄嚇，身披孝服，曲背低頭哭我為娘， 呼我為媽呀！”（此婦算深沉，真想 得透）想到此處，忍淚不住，以手掩口，哽咽低聲曰 ：“孩兒 呀，我知你死得苦咯！我知難為你老母咯！我如今知悔恨咯！
你在九泉之下，勿怪責我咯！”話完，又暗哭不止。停一息間，抹幹眼淚，叫婢買寶燭回來，在天井中點爝，要婢扶出到簷前，跪住叩頭，密稟不知甚麼說話，以頭亂叩地上，叩得一頭沙泥，額上肉都凸起。拜完，扶回床上，大歎一聲，出一身合汗。即將心腸改變，化作仁慈。（人話江山易改，稟性難移，個句說話亦假）
由是待妾如姐妹一般，親同骨肉，有不合處細心教道，不出高聲，妾亦歡心奉事。姚氏自知罪過，不肯請醫調理，不過以香爐灰敷之。誰知十日之間，乳瘡生肌理，日似有神助，姚氏自後更發心為善，有益人者方便為之。三年後，妻妾各生一子，長大讀書，皆稱俊秀。人話省城天子馬頭，係殺人地。誰知閨房之內，都有殺人地也。
人話男子做殺手，不知女人亦有做殺手也，如家婆治死新婦，主人婆治死婢女，妻逼死妾，婦謀死夫，世界之間，亦時所有。今姚氏不害其妾而害其子，不明發於聲而暗施其毒，外貌施脂粉，細語嬌聲，欲得丈夫憐愛，誰不知溫柔手段有殺人刀，欲斬先人之血脈，覆轉香爐黑火鳥燈，甘為餓鬼。為丈夫者，不知其意，因妻有病，數載調醫，豈知同枕而不洞心，顧前而不顧後。姚氏能欺人不見，不能瞞得灶神，上奏於天，原情定罪，三年大病，苦楚纏綿，枕席難安，即是生前地獄。若非其叔說破，何時悔過收心？及至自怨悲嗟，方知前錯，一轉念間，改頭換麵，洗過心腸，髒腑之毒氣皆清，惡大婆變而慈悲菩薩，一團和氣，滿麵春風，天降麟兒，吉祥歡喜。然後信前此者，孽由自作，後此者，福自已求也。