23.戒貪謀
命該富，白紙變成布。命該窮，黃金變成銅。冤枉把錢找，命裏冇錢找唔倒。損人利己心腸壞，全當找倒也會敗。唔如銀錢看得穿，冇災冇難得平安。
24.戒信邪教
事愛正，心愛定，邪教唔可信。妖人專害人，不愛進佢陣。你求富，佢約你同財。把你銀錢拐到手，一去永唔來。你求仙，佢約你出家。老婆妹子同路去，受的閉口痧。你求貴，佢約你造反。一下事情發作了，全家都問斬。銀錢丟，姑娘羞，性命休，拿畀妖人一下收。一時信妖言，受害真可憐。各人受本分，莫同妖人纏。
25.戒燒會
人愛頂糊塗，正去進江湖。名安做拜弟，唔如當家奴。有錢大娘使，有禍你去抵。隨在大爺講，毛子唔敢強。喊你去挨刀，唔敢到處猋。惹人告一狀，拉到衙門上。王法唔能躲，私刑過惱火。唔進江湖唔受欺，欺了本分人，世上都唔依。
26.勸士
讀書講人仁，莫專講詩文；在家講父子，做官講君臣。夫婦愛相敬，弟兄莫生分，朋友有情分。孝悌忠信做得夠，禮儀廉恥講得透。常講勸世文，勸好世上人。家族有事愛擔承，鄉黨有事愛調停。教賴子，教老婆，教了孝順教謙和。勸家門，勸親戚，勸渠學好把福積，一切事情莫混帳，好畀眾人做榜樣。日後做了官，忠心報皇上。莫學編筐筐，見事就想方。隻圖弄幾個，唔怕天理傷。做官害一路，在鄉害一鄉。枉讀聖賢書，一定受天誅。
27.勸農
做莊稼，冇師父，隻愛舍得糞來注。種棉花，種荄椒，多種高粱有柴燒。種茄子，種甘蔗，薑嫲種了一大壩。到四月，忙載秧，胡豆麥子收進倉。麻枯糞，使得多，秧子後來正大窩。栽下去，又要薅，包粟種遲唔滿包。種芋子，種番薯，又種冬瓜種黃瓠。到七月，收穀，大小進屋。收了一樣又一樣，又煮豆豉又做醬。又舂麻粸又蒸酒，一直忙到九月九。白露過了是秋分，收了大春種小春。各樣都要種點點，千萬唔種鴉片煙。多種麥子好磨麵，麥麵折餐頂方便。堰塘冬水滿東東，小春種完講過冬。蒜苗蘿卜滿菜園，打整屋舍過新年。錢糧早早上，冇事莫趕場。聖諭隨時講，練團防打搶。愛使銀錢去賣貨，有貨變錢就好過。老婆勤儉會當家，賴子本分唔惹禍。樣就安做福氣好，莫嫌莊稼賺錢少。
28.勸工
手藝人，莫耍奸，勤快做事莫偷懶。一唔愛，嫌酒菜，粗茶淡飯隨人待。二唔愛，嚼牙巴，走道東家講西家。手藝高，脾氣好，做過幾年就弄倒。積攢有錢夠食飯，唔做手藝也當淡。
29.勸商
做買賣，莫欺人，鬥秤進出愛公平。價又矮，貨又高，買主來了唔得猋。把利錢，看得輕，貨唔停留利自生。莫濫酒，莫好賭，多積銀錢辦家務。貨真價實正實在，實在唔怕生理壞。
30.勸修積
唔怕命唔好，隻怕修積少。前生修積今生好，祖人餘福享得倒。今生修積來生好，富貴功名發得早。年輕修積老來好，先苦後甜甜到老。祖人修積後人好，子子孫孫多財寶。在生修積死了好，油鍋刀山免得了。冇錢修積發得快，有錢修積永唔敗。修積唔消花大鈔，隻愛爺麵前能盡道。修積唔消出遠門，隻愛勸化得倒一家人。親戚家門常關顧，見人落難就救護，就是修積實在處。
31.勸唱《廣東小兒歌》
廣東歌，莫嫌俗。廣東人，愛唱熟。唱熟識人情，當讀勸世文。自家勸好了，又好勸別人。勸得世上好人多，齊家同唱太平歌。唱完了，笑嗬嗬，笑嗬嗬。
廣東子弟多半不解官話，每有讀書數年，一句不解，雖讀何用。以此教之，則句句能講能用。一童歌之，群童和之，壯者老者亦和之，婦幼女子又和之。借以知善惡而明吉凶，於地道人心，豈無小補哉！