13.勸救濟
黃雞嫲，生白蛋，家家屋下有長短。人家有事情，再莫看笑神。幫忙來鬧好，人家領你情。人家家唔好，再莫去挑唆。挑唆成口角，害人禍事多。人家有災難，出力去解散。淘神莫辭勞，貼錢也當淡。人家有難你救佢，自家有難天救你。
14.勸老人
老阿婆，老阿公，老人莫顛東。裝兜啞，裝兜聾，免得朝日氣衝衝。老朋友，老親戚，有講有笑好過日。食下酒，食下歌，朝朝日日笑嗬嗬。待子孫，心愛平，心不公平搞唔成。惜一隻，惱一隻，子孫拷蘺又打壁。教子孫，學勤快，又勤又儉家唔敗。教子孫，學和氣，和和氣氣有好事。子孫事好莫誇口，教佢惜福得長久。子孫事孬莫心焦，教佢學好會翻梢。教佢得子孫好，當得撿倒寶，老人安樂冇煩惱。
15.戒談閨閫
阿二哥，阿三舅，心愛好，嘴莫多。心上莫亂想，嘴巴莫亂講。想害人，天唔容，受苦受難一世窮。亂講人，有大過，後來一定惹大禍。自家有醜怕人知，人家講你你唔依。人家有醜係一樣，再莫倒到處唱。人家老婆人家管，也莫講長，也莫講短。
16.勸細學生子
菜子開花滿壩黃，細學生子進學堂。一早就愛去，天光就下床。讀書趁年輕，莫話日子長。功名係小事，愛學存天良。先愛學禮信，作輯愛恭敬。走路莫亂竄，見人就愛問。讀書愛發狠，讀了就愛認。講書把細聽，寫字愛端正，第一講善惡，第二講報應。讀書學好人，先愛學孝順。講話識輕重，做事愛謹慎。讀書唔能做好人，枉自中舉點翰林。愛學好人恁般做，先愛善惡識得破。
17.勸妹子
三月楊柳青又青，妹姐講話莫大聲。發狠做活路，做到二三更。有事趕緊做，有食唔愛爭。愛聽話，愛孝道，爺孃麵前莫拗爆，敬大嫂，敬阿哥，哥嫂有錯莫挑唆，惜老妹，惜老弟，做大姐個唔愛歪。學績麻，學紡棉，熱天冷天有包纏。勤經布，勤喂蠶，後來行嫁有嫁奩。愛幹淨，愛伶俐，邋遢討厭棄。坐愛正，行愛端，唔係至親莫亂聞，廣東歌，愛記倒，曉得善惡實在好；記得歌，當讀書，免得人家話你像頭豬。
18.勸惜心舅
家娘待心舅，愛當親妹子。親家辛苦來帶大，家娘撿到現成使。心舅做錯事，家娘莫火起。家娘唔火起，心舅偷歡喜，越發聽教聽管依規矩。你越心痛佢，佢越孝敬你，莫講心舅隔層皮。莫亂叨，莫亂罵。把麵罵囚了，心舅顛轉唔聽話。病愛心舅來服侍，死愛心舅來祭祀。恁般一點唔合式，就拿心舅來出氣。細心舅咁可憐，因為爺冇得錢，交畀家娘去包纏。家娘過愛耐煩帶，莫把心舅蹉磨壞。帶過幾年心舅大，家娘有事佢擔待。幾多賴子死了心舅守，冇食冇著佢唔走。紡棉績布唔歇手，愛同公婆顧身又顧口。
19.戒打官司
隨在人家欺，再莫打官司。人家耍橫耍霸道，情願作揖磕頭去送禮。陪禮佢唔幹，收拾兩桌飯，去請地鄰保甲來勸散。再莫進衙門，拿倒呈子去告人。衙門唔生草，專等空中來進寶。呈子遞進去，想了唔得了。差人像老虎，房書橫腸又吊肚。冇得錢畀佢，喊你轉去賣牛牯。錢使夠了去過問，官司輸贏話唔定。輸了挨打又挨枷，贏了也把銀錢花。一時唔依佢，銀錢使過餘。想出一口氣，整掉一身皮。把細想下子，真正唔犯於。
20.戒洋煙
鴉片煙，是冤牽。食又食唔飽，何苦食倒受熬煎。一時去食倒，想丟丟唔了。有錢食了煙，家當就會倒。冇錢食了煙，唔能把錢找。唔管柴，唔管米，睡倒床上爬唔起。唔管子，唔管女，一家大細冇規矩。爺孃急起病，老婆想改姓。愛勤唔能勤，愛儉唔能儉。勸你趕緊戒，學勤學儉家唔敗。
21.戒殺女
養妹子，莫打死。打死愛犯罪，有人告發了唔起。妹子也係命一條，糟蹋人命官唔饒。照例打八十，愛著紅衫坐監牢。唔如洗起來，陪奩隨家財。多多少少由你辦，拉帳嫁女唔愛幹。莫話帶女冇點好，幾多跟倒妹子去過老。
22.戒賭
命裏該發財，慢慢會發作。再莫亂想錢，場火裏背去賭博。佢係老咕嚕，慣賭唔怕輸。你係新毛子，恁般輸得起。剛剛揭幾寶，串把就捋了。冇得錢下注，脫衫又脫褲。輸得精打光，冇地頭想方。唔敢見至親，冇地頭安身。隻好去討口，又怕遇惡狗。數九天氣雪花飄，又餓又冷怕跌跤。一跤跌倒冇氣來，驗成路斃就下台。一抬抬到萬人坑，豬拉狗扯冇香煙。可憐爺女哀 唔知信，還在到處去訪問。