第一章 骨肉試真情 (1)
香山縣有一人姓明，兩兄弟，兄名克德，弟名俊德。父母先亡，遺下家產值數千金。克德娶妻淩氏，知情達理，女中之君子也，上能敬夫，下能愛叔。俊德十七八歲，尚未成婚，在家管理耕種。
克德相交兩個朋友，一個姓錢，一個姓趙。兩人不是正經人物，本係無賴之徒，到來一味奉承，想貪飲食。克德又唔明白，以姓錢為知心，以姓趙為知己。（克德心盲，又遇瞳人反皆，所以，唔望得真自己，又唔望得真人）錢趙兩人得意遇時，講三都七國本事非凡。克德本來唔好性情，遇人得罪佢，就一肚火氣，錢趙不去潑水，反去添油，話 ：“駛乜怕佢呀！有咁 丟駕就打佢，奈乜何就告佢亦易事 。”姓錢話：“兵房師爺係 我姐夫 。”姓趙話：“三班總頭係我老契。”克德拍掌喜曰： “有咁樣人事，隨便車天。”滿斟一杯勸姓錢曰：“好手足。” 又斟一杯勸姓趙曰 ：“好兄弟。”三人暢飲，劈口高歌，或猜 拳，或大笑。克德大聲曰 ：“喊我細佬來，快的趕去炙燒酒、 殺雞，唔得及，將廿隻鴨蛋打破，濕半斤蝦米，切一兩臘肉絲，發猛火，洗鍋仔，快的炒熟來！”
誰不知俊德見個樣情形，聽此等說話，心內帶幾分唔中意，又惱錢趙二人常來攪擾，俱是無益之談，漸漸生出怒氣。有時錢趙二人來探，值克德不在家，俊德不甚招接，錢趙二人知其憎厭。一日與克德飲酒時，姓錢帶笑開言曰 ：“老明，你地出 來處世，真第一等人，與朋友交，疏財大義，可稱慷慨英雄。”
克德曰 ：“好話咯，不敢當。”姓趙曰：“在你無可彈，但係你令弟，與你性情爭得遠，佢待我亦唔醜見，佢待你太冷淡無情。論起番來，長哥當父，對亞哥唔恭敬，未免都不合理 。” 克德曰 ：“唔知點樣解，我又硑罵佢，又打佢，就見了我好似唔中意，個龜蛋想起來真可惡咯 。”（漸漸火起咯）姓錢曰： “睇佢心事，好似思疑你做亞哥，瞞騙於佢。”克德曰：“有 點瞞騙佢呢？不過有好朋友來，（姓錢共姓趙）飲多的，食多的，咁樣之嗎？”姓錢曰 ：“佢唔係思疑你個的，必定思疑你 吞騙錢財，慌你舂了落荷包，個樣是真 。”（姓錢咁伶俐）克 德曰 ：“我個心如青天白日，（誰知墨咁黑）朋友所知呀。” 姓趙曰 ：“朋友盡知，總係你令弟唔知 。”克德曰：“難咯，難咯！有時話朋友好過兄弟， 正為此也 。”（遲下你就知）錢趙兩人勸曰 ：“老明，你莫激氣，細佬唔明白，務宜忍住個肚， 不可怒出外麵。（好勸諫 ）講起來似乎離間你兄弟，（都唔係 似乎，分明便係真正）不過蒙你過愛， 即管講句 。”（不是即管講，其實盡力講）以知你委曲耳 。”（錢趙之心重更曲）克 德自從聽過兩人之言，心中漸漸不同，作細佬如仇人一樣，一語不合就罵，一事不合就打。
一夕睡在床中，淩氏諫曰 ：“翁姑生你兩人，兄弟之親， 能有幾個呢？為何一見細佬，就憎得咁淒涼，唔通骨肉之情，不如朋友？你知厚待朋友，何以薄待同胞？是愛疏而不愛親，顧外而不顧內也 。”（此張枕頭狀，原甚少見，又好呈詞，理 應批準為是）明克德曰 ：“莫講、莫講，個的腳色不中用，唔 做得料駛 。”（批出不準）淩氏曰：“細佬唔中用，你的朋友 好中用麼？”（再入紙）克德曰：“我的朋友，唔係嘻嘻，聽錢趙兩友講起來，可以落水舂牆，替生替死，與我細佬爭得遠咯！”淩氏曰：“替死之事，都要試過方知，以我心意，朋友要交，兄弟要愛，睇你的友，都係貪你飲，貪你食，重怕拖你落水，都唔定也 。”（此婦人乜咁本事，能料得咁透）克德曰： “你女人家，曉得乜東西，隻曉得買好油搽髻，男人大丈夫， 有乜聽老婆說話呢！（唔聽你有錯）我自有主見，你不得多言。
”淩氏歎曰：“別個婦人向枕上造是非，故意想離人骨肉，人家做男子，尚者所從，惟我勸你愛自己細佬，你做老公，唔謊信我一句，嫁得你咁硬頸，有乜法子呢！”克德曰 ：“細佬無 好處，我就唔愛佢，你共佢實久好麼？”淩氏歎氣一聲，默然無語。克德遂將細佬趕逐出門。俊德走往鄰村酒米鋪，做火頭棲住。錢趙兩人，自後更無忌彈，三日來一輪，五日來一次，捉狗仔，切魚生，彈琵琶，吹鴉片，嫖賭飲蕩，辣得周身引，好似大花筒。（相與個的邪朋匪友，練做敗家精規模）淩氏泣諫不從，付之長歎。
一晚，克德在祠堂飲酒歸，形容半醉，淩氏在門邊等候，以手指之曰：“你止曉得盡日醉。”克德曰：“唔醉有乜事呀？
”淩氏曰：“你話硑乜事，就有事，過你哩？”克德怒氣入房，橫眠床上，淩氏附耳細語低聲曰 ：“如今後花園殺死一人，棄 屍在地，你尚睡得咁安樂麼？”克德聞言大驚，如冷水澆背，麵色發青，即拍床起曰 ：“殺死誰人？”淩氏曰：“不知。” 問誰人所殺，淩氏曰：“不知。”克德曰：“快引我去看。”