第二十一回 問失物瞞客詐求簽 限歸期怕妻偷擺酒
按：陶玉甫請陶雲甫到李漱芳房裏來坐。雲甫先問漱芳的病，便催玉甫洗臉打辮，吃些點心然後各自上轎，出東興裏，向黃浦灘來。隻見一隻小火輪船泊在洋行碼頭。先有一肩官轎、一輛馬車，傍岸停著。陶雲甫、陶玉甫投上名片，黎篆鴻迎進中艙。艙內還有李實夫、李鶴汀叔侄兩位，也是來送行的。大家相見就坐，敘些別話。
須臾，於老德、朱藹人乘轎同至。黎篆鴻一見，即問：“如何？”朱藹人道：“說好哉，總共八千洋錢。”黎篆鴻拱手說：“費神。”李實夫問是何事，黎篆鴻道：“買兩樣舊物事。”於老德道：“物事總算無啥，價錢也可以哉，單是一件五尺高景泰窯花瓶就三千洋錢哚。”李實夫吐舌搖頭道：“（要勿）去買哉，要俚做啥？”黎篆鴻笑而不言。
徘徊片刻，將要開船，大家興辭登岸。黎篆鴻、於老德送至船頭，陶雲甫、陶玉甫、朱藹人皆乘轎而回。惟李實夫與李鶴汀坐的是馬車。馬夫本是稔熟，徑駛至四馬路尚仁裏口停下。李實夫知道李鴻汀要往楊媛媛家，因推說有事，不肯同行。鶴汀知道實夫脾氣，遂作別進弄。
李實夫實無所事，心想：天色尚早，那裏去好？不若仍去擾諸十全的便飯為妙。當下一直朝西，至大興裏，剛跨進諸十全家門口，隻見客堂裏坐著一個老婆子，便是花雨樓所見擠緊眼睛的那個。實夫好生詫異。諸三姐迎見，嚷道：“阿唷！李老爺來哉。”說著，慌即跑出天井，一把拉住實夫袖子，拉進客堂。那老婆子見機，起身告辭。諸三姐也不留，隻道：“閑仔末來白相。”那老婆子道謝而去。諸三姐關門回來，說：“李老爺樓浪去囗。”
實夫到了樓上，房內並無一人。諸三姐一麵劃根自來火點煙燈，一麵說道：“李老爺，對勿住，請坐一歇。十全末燒香去，要轉來快哉。耐吃煙囗。我去泡茶來。”諸三姐正要走，實夫叫住，問那個老婆子是何人。諸三姐道：“俚叫郭孝婆，是我個阿姐。李老爺阿認得俚？”實夫道：“人是匆認得，來浪花雨樓看見仔幾轉哉。”諸三姐道：“李老爺，耐勿認得俚，說起來耐也曉得哉。俚末就是倪七姊妹個大阿姐。從前倪有七個人，才是姊妹溝裏，為仔要好了，結拜個姊妹，一淘做生意，一淘白相，來裏上海也總算有點名氣個哉。李老爺，耐阿看見照相店裏有‘七姊妹’個照相片子？就是倪（口宛）。”實夫道：“噢，耐就是七姊妹。價末一徑倒勿曾說起。”諸三姐道：“阿是說仔七姊妹，李老爺就曉得哉。難故歇個七姊妹，勿比得先起頭，嫁個末嫁哉，死個末死哉，單剩倪三家頭來浪。郭孝婆是大姐，弄得實概樣式。我末挨著第三。再有第二個阿姐，叫黃二姐，算頂好點，該停幾個討人，自家開個堂子，生意倒蠻好。”實夫道：“故歇郭孝婆來裏做啥？”諸三姐道：“說起倪大阿姐來，再討氣也無撥。本事末挨著俚頂大，獨是運道勿好。前年還尋著一頭生意，剛剛做仔兩個月，撥新衙門來捉得去，倒說是俚拐逃，吃仔一年多官司，舊年年底坎坎放出來。”
實夫再要問時，忽聽得樓下門鈴搖響。諸三姐道：“十全轉來哉。”即忙下樓去迎。實夫抬頭隔著玻璃窗一望，隻見諸十全既已進門，後麵卻還跟著一個年輕俊俏後生，穿著玄色湖縐夾衤，白灰寧綢棉褂。實夫料道是新打的一戶野雞客人，便留心側耳去聽。聽得諸三姐迎至樓下客堂裏，與那後生唧唧說話，但聽不清說的甚麼。說畢，諸三姐乃往廚下泡茶，送上樓來。
實夫趁此要走，諸三姐拉住低聲道：“李老爺（要勿）去囗。耐道是啥人？該個末就是俚家主公呀，一淘同得去燒香轉來。我說樓浪有女客來裏，俚匆上來，就要去哉。李老爺，耐請坐一歇，對勿住。”實夫失驚道：“俚有實概一個家主公！”諸三姐道：“倒勿是。”實夫想了一想道：“倘忙俚定歸要樓浪來末，那價呢？”諸三姐道：“李老爺放心。俚阿敢上來！就上來仔，有我來裏，也匆要緊（口宛）。”
實夫歸坐無語。諸三姐複下樓去張羅一會，果然那後生竟自去了。諸十全送出門口，又和諸三姐同往廚下唧唧說了一會，始上樓來陪實夫。實夫問：“阿是耐家主公？”諸十全含笑不答。實夫緊著要問，諸十全喀道：“耐問俚做啥嗄？”實夫道：“問問耐家主公末也無啥（口宛），阿有啥人來搶得去仔了發極。”諸十全道：“（要勿）耐問。”實夫笑道：“噢唷！有仔個家主公了，稀奇得來！問一聲都勿許問。”諸十全伸手去實夫腿上扌卒了一把，實夫叫聲“阿唷喂”。諸十全道：“耐阿要說？”實夫連道：“勿說哉，勿說哉！”諸十全方才放手。